Outside and Inside Programs Experiences

ໂຄງການ JENESYS ແລກປ່ຽນເຕັກນິກກ່ຽວກັບການປ້ອງກັນໄພພິບັດ ແລະ ສິ່ງແວດລ້ອມ (Exchange for Environment & Disaster Prevention Technology Tentative) ຕັ້ງແຕ່ວັນທີ 16 – 23 ຕຸລາ 2018

#ດັ່ງທີ່ທຸກຄົນຮູ້ວ່າໂຄງການນີ້ແມ່ນຟຣີ!!

ມື້ນີ້ຂ້ອຍເອງຈະມາແບ່ງປັນປະສົບການທີ່ໄດ້ເຂົ້າຮ່ວມໂຄງການ JENESYS ແລກປ່ຽນເຕັກນິກການປ້ອງກັນໄພພິບັດ ແລະ ສິ່ງແວດລ້ອມທີ່ປະເທດຢີ່ປຸ່ນ.

ຂ້ອຍເອງເຊື່ອວ່າຫຼາຍຄົນໜ້າຈະຮູ້ແລ້ວວ່າໂຄງການ JENESYS ນີ້ແມ່ນໂຄງການຫຍັງ? ແຕ່ຖ້າຍັງບໍ່ຮູ້ເທື່ອ ຂ້ອຍກໍໄດ້ແປະລິ້ງການແນະນໍາຄ້າວໆກ່ຽວກັບໂຄງການນີ້ໄວ້ຂ້າງລຸ່ມບົດຄວາມນີ້ແລ້ວ ລວມທັງວິທີການສະໝັກເຂົ້າຮ່ວມໂຄງການຈາກສິດເກົ່າເພິ່ນ.

ທ້າຍສຸດຍັງມີຮູບພາບເສີມອີກດ້ວຍ ຮະໆ

ບາດນີ້ເຮົາມາເລີ່ມປະຈົນໄພນໍາກັນເທາະ!!

ມື້ວັນທີ 15 ຕຸລາ 2018 ແມ່ນໄດ້ເວລາອອກເດີນທາງໄປຍີ່ປຸ່ນແຕ່ Transit ຢູ່ກຸງເທບກ່ອນ.

ວັນທີ 16 ຕຸລາ 2018 ໃນຕອນເຊົ້າກໍມາຮອດຍີ່ປຸ່ນ ແລ້ວເວລາ 09:45 ກໍເດີນທາງໄປໂຮງແຮມ Shinbashi Atagoyama Tokyu REI Hotel. ເມືອເຖິງບ່ອນພັກກໍພາກັນແຍກຍ້າຍຂຶ້ນໄປພັກຜ່ອນກັບກຸ່ມໃຜລາວ. ດີໃຈທີ່ໄດ້ພັກຜ່ອນໃນຈຸດໆນີ້ ຮະໆ.

ໂຮງແຮມ ແລະ ຫ້ອງພັກ

ມາຮອດຕອນທ່ຽງ ກໍພາກັນຍ່າງຈາກໂຮງແຮມໄປຮ້ານອາຫານ Oto-Oto ຂອງມື້ດຽວກັນ ຫຼັງຈາກນັ້ນກໍໄດ້ພາກັນໄປລວມທີ່ຫ້ອງບັນຍາຍເພື່ອເຂົ້າໃຈເຖິງຈຸດປະສົງຂອງໂຄງການ, ເປົ້າໝາຍຂອງແຕ່ລະລາຍການ.

ຫຼັງປະຊຸມກໍພາກັນນັ່ງລົດເມຈາກຫ້ອງປະຊຸມ Nishikanten ໄປວັດອາຊາກຸຊາ ແລ້ວພາກັນຊົມວິວ ຖ່າຍຮູບທີ່ສວຍງາມໃນແຕ່ລະເຂດ ຢາກບອກວ່າ ນັກທ່ອງທ່ຽວກໍຫຼາຍພໍສົມຄວນ ເວລາຖ່າຍຮູບກໍຕ້ອງຖ້າຈັກຫວະທີ່ເໝາະສົມ ຮະໆ ມາຮອດເວລາ 5 ໂມງກໍພາກັນຍ່າງຈາກວັດອາຊາກູຊາ ໄປຮ້ານອາຫານ Origami ເພື່ອກິນອາຫານແລງ. ຈາກນັ້ນກໍເດີນທາງກັບໂຮງແຮມໄປພັກຜ່ອນ.
ວັດອາຊາກູຊາ

ວັນທີ 17 ຕຸລາ 2018 ຕອນເຊົ້າແມ່ນຍ່າງໄປຫ້ອງປະຊຸມ Nishikanten. ມາຮອດເວລາ 10:00 – 11:00 ແມ່ນຟັງການບັນຍາຍ ກ່ຽວກັບລະບົບສັງຄົມ, ການເມືອງ, ນະໂຍບາຍການທູດ, ປະຫວັດສາດ ແລະ ວັດທະນະທໍາຍີ່ປຸ່ນໂດຍສາດສະດາຈານ OHORI Ken ຈາກສະຖາບັນຄົ້ນຄວ້າວິທະຍາສາດສັງຄົມມະຫາວິທະຍາໄລໂຕກຽວ, ແລ້ວໃຫ້ລອງສົມທຽບຄວາມແຕກຕ່າງລະຫວ່າງຍີ່ປຸ່ນ ແລະ ປະເທດລາວ ເພື່ອສ້າງຄວາມເຂົ້າໃຈຢ່າງເລິກເຊິ່ງກ່ຽວກັບຍີ່ປຸ່ນ.

ຕອນທ່ຽງແມ່ນກິນອາຫານທ່ຽງທີ່ຮ້ານອາຫານ Dekkaido

ຢາກບອກວ່ານີ້ແມ່ນຊຸດອາຫານທີ່ຂ້ອຍກິນຄົນດຽວ ແຕ່ລະຄົນກໍໄດ້ຄົນລະຊຸດ ທັງແຊບທັງອີ່ມງານນີີ້ ອິໆ

ພາບນີ້ຍັງບໍ່ມີຄົນໃຫ້ປ້ອນເທື່ອກໍເລີຍຕ້ອງປ້ອນຕົນເອງໄປກ່ອນ 555

ມາຮອດເວລາ 15:00-15:30ໂມງແມ່ນ ເດີນທາງໄປທັດສະນະພິພິດຕະພັນ RyuQ ແລະ ລົງສໍາຫຼວດຊ່ອງລະບາຍນໍ້າໃນເຂດປະລິມົນທົນ ເພື່ອສັງເກດການນໍາໃຊ້ເຕັກນິກທີ່ທັນສະໄໝລ້າສຸດ, ສ້າງຄວາມເຂົ້າໃຈກ່ຽວກັບສະພາບແວດລ້ອມ ແລະ ການປ້ອງກັນໄພພິບັດຂອງຍີ່ປຸ່ນ ພ້ອມໄກ້ນໍາພາຍ່າງພາໄປນໍາ ແລະ ອະທິບາຍໄປນໍາ.

ພິພິດຕະພັນ RyuQ ແລະ ລົງສໍາຫຼວດຊ່ອງລະບາຍນໍ້າໃນເຂດປະລິມົນທົນ

ຕອນແລງ 4 ໂມງປາຍກໍນັ່ງລົດເມເດີນທາງໄປຮ້ານອາຫານ Edozawa ເປັນອາຫານຊູໂມ ຫຼັງຈາກນັ້ນກໍເດີນທາງກັບໂຮງແຮມເພື່ອໄປພັກຜ່ອນ.

ອາຫານຊູໂມ

ວັນທີ 18 ຕຸລາ 2018 ໄດ້ເວລາເດີນທາງໄປແຂວງອິວາເຕະ Iwate ດ້ວຍລົດໄຟຊິນກັນເຊນ Hayabusa ຈາກສະຖານີລົດໄຟໂຕກຽວໄປສະຖານີລົດໄຟໂມຣິໂອກະ Morioka. ໃນລະຫວ່າງການເດີນທາງໄປສະຖານທີ່ຕ່າງໆຈະສັງເກດເຫັນຄວາມທັນສະໄໝຂອງພື້ນຖານໂຄງລ່າງການຄົມມະນາຄົມຍີ່ປຸ່ນ, ການຄວບຄຸມລະບົບການສັນຈອນ, ການຮັັັກາຄວາມປອດໄພ, ການບໍລິການ, ການເອົາໃຈໃສ່ຕໍ່ຜູ້ທີ່ອ່ອນແອໃນສັງຄົມ ແລະ ການຮັກສາສະພາບແວດລ້ອມ. ສ່ວນອາຫານທ່ຽງແມ່ນກິນໃນເທິງລົດໄຟເລີຍ ເພາະເພິ່ນຢາຍກ້ອງອາຫານໃຫ້ແຕ່ລະຄົນ.

ພາບເດີນທາງ ແລະ ອາຫານທ່ຽງ

ເມືອເຖິງສະຖານທີ່ແລ້ວ ເມືອມາຮອດເວລາ 4 ໂມງແລງກໍໄດ້ໄປຟັງການບັນຍາຍກ່ຽວກັບທ້ອງຖິ່ນຂອງພວກເຂົາ ເຊິ່ງເປັນຂໍ້ມູນທົ່ວໄປກ່ຽວກັບເມືອງກາມາອິຊິ Kamaishi ລວມທັງສະພາບການພື້ນຟູຂອງເມືອງຫຼັງຈາກປະເຊີນໜ້າກັບຄື້ນຊຶນາມິ ກໍເພື່ອສ້າງຄວາມເຂົ້າໃຈກ່ຽວກັບທ້ອງຖິ່ນທີ່ໄປຢ້ຽມຢາມ.

ພາບການບັນຍາຍ

ວັນທີ 19 ຕຸລາ 2019 ຊ່ວງເຊົ້າແມ່ນເຂົ້າຢ້ຽມຄໍານັບເຈົ້າເມືອງກາມາອິຊິ Kamaishi ທ່ານ Takenori Noda ແລະ ໂອ້ລົມກັບເພິ່ນ.

ຫຼັງຈາກນັ້ນກໍຂີ່ລົດເມເດີນທາງໄປສໍາຫຼວດ ແລະ ຮຽນຮູ້ກ່ຽວກັບການເຄື່ອນໄຫວພື້ນຟູຂອງປະຊາຊົນຈາກອຸທົກກະໄພ.

ກໍາແພງຕ້ານຄື້ນຊຶນາມິ

ຫຼັງຈາກນັ້ນກໍເດີນທາງໄປຟັງການບັນຍາຍກ່ຽວກັບການປ້ອງກັນໄພ, ຮຽນເອົາບົດຮຽນເວລາເກີດໄພພິບັດ ແລະ ວິທີຮັບມືກັບມັນ ຈາກທ່ານ Ryuta Kubo ຈາກ Kamaentai, ທ່ານ YuseiFujii ກ່ຽວກັບເປົ້າໝາຍຂອງຍຸດທະສາດຂອງ Kamaishi Open City.

ແລ້ວໄປກິນອາຫານທ່ຽງ

ນັ່ງກັບສາວງາມໃຜກໍຍິ້ມບານປານຫຍັງ ຮະໆ

ມາຮອດ 2 ໂມງກໍເປັນການເດີນທາງໄປຮັບຟັງ ແລະ ຮຽນຮູ້ກ່ຽວກັບໄພພິບັດ “ເສັ້ນທາງຊີວິດ” ທີ່ Houraikan ນໍາພາໂດຍທ່ານ: Ito ເຊິ່ງເປັນປະທານ Samriku Hitotsunagi Nature School. ເຊິ່ງເປັນຊ່ວງທີ່ຮັບຟັງປະສົບການໜີໄພຈາກເພິ່ນ ພ້ອມທັງຍ່າງຂຶ້ນພູຕົວຈິງ ເຊິ່ງເປັນພູທີ່ຄົນແຖວນັ້ນແລ່ນໜີຂຶ້ນຈາກຄື້ນຊຶນາມິ ແລະ ການຊ່ວຍເຫຼືອຜູ້ທີ່ຖືກນໍາຊັດເຂົ້າມາຂອງເພິ່ນ. ຊ່ວງນີ້ແຕ່ລະຄົນແມ່ນຕັ້ງໃຈຟັງຫຼາຍ ແລະ ເສົ້າໄປຕາມໆກັນ ເພາະນອກຈາກການບັນຍາຍແລ້ວ ເພິ່ນຍັງເອົາວິວີໂອມາສາຍໃຫ້ເບິ່ງຕອນທີ່ຄື້ນຊຶນາມິຊັດເຂົ້າມາ ແລະ ພັດຄົນໄປ ແລະ ສິ່ງຕ່າງໆຢູ່ໃນບໍລິເວນເມືອງ.

ໂຮງແຮມທີ່ຍັງຄົງຢູ່ ຫຼັງຈາກຄື້ນຊຶນາມິຊັດເຂົ້າມາເກືອບແປດກ່ອນໜ້ານີ້

ພາບການປີ້ນຂຶ້ນພູ

ຄື້ນຊຶນາມິແມ່ນເກີດມາຈາກທະເລທາງຫຼັງນັ້ນໃນປີ 2011

ຕອນແລງແມ່ນໄດ້ເຂົ້າຮ່ວມພິທີພົບປະກັບຄອບຄົວໂຮມສະເຕທີ່ເຮົາຈະໄປພັກນໍາໃນໄລຍະເວລາ 1 ມື້ປາຍ ເພື່ອສ້າງປະສົບການສໍາຜັດກັບວັດທະນະທໍາ ແລະ ການດໍາລົງຊີວິດຂອງຄົນຍີ່ປຸ່ນຜ່ານໂຮມສະເຕ.

ວັນທີ 20 ຕຸລາ 2018 ແມ່ນພັກຢູ່ໃນໂຮມສະເຕ ລວມທັງສ້າງປະສົບການສຳຜັດວັດທະນະທໍາ ແລະ ການດໍາລົງຊີວິດຂອງຄົນຍີ່ປຸ່ນ. ທໍາອິດທີ່ຮອດເຮືອນເພິ່ນ ກໍໄດ້ລິມລົດອາຫານທະເລສົດໆເລີຍ ບໍ່ວ່າຈະເປັນກຸ້ງໃຫຍ່ ປາມຶກ ແລະ ອື່ນໆ ອາຫານແຊບຫຼາຍ ຄອບຄົວເພິ່ນແມ່ນເປັນຊາວປະມົງ. ຊ່ວງເວລາອາໄສຢູ່ນໍາເພິ່ນ ເພິ່ນກໍພາໄປເລາະທາງນັ້ນທາງນີ້ ແລະ ໄປຮັບລູກເພິ່ນທີ່ໂຮງຮຽນນໍາ ລວມທັງການພາອອກໄປທະເລໄປເບິ່ງວິຖີຊີວິດແບບຊາວປະມົງນໍາເພິ່ນ ຮູ້ສຶກປາບປຶ້ມ ແລະ ດີໃຈຫຼາຍ ມາຮອດປັດຈຸບັນນີ້ກໍຍັງຄິດຮອດຄອບຄົວເພິ່ນເໝືອນເດີມ ໂດຍສະເພາະນ້ອງຊາຍທັງ 4 ຄົນ.

ງານເທດສະການບຸນກາມາອິຊິທີ່ເມືອງ

ພາບໄປເບິ່ງການສະແດງລະຄອນເວທີ ແລະ ຮ້ອງເພງປະສານສຽງຂອງລູກເພິ່ນ

ໄປເບິ່ງການແຂ່ງຂັນ Basket ball ຂອງລູກຊາຍກົກເພິ່ນ

ໄປເດີນທະເລເບິ່ງວິຖີຊີວິດຂອງຊາວປະມົງ

ກໍາແພງຕ້ານຄື້ນຊຶນາມິ ທີ່ເລິກທີ່ສຸດໃນໂລກ

ວັນທີ 21 ຕຸລາ 2018 ເປັນມື້ເຂົ້າຮ່ວມງານລ້ຽງອໍາລາຄອບຄົວໂຮມສະເຕໃນຕອນເຊົ້າ

ປຶ້ມຮູບພາບທີ່ຄອບຄົວຄົນຍີ່ປຸ່ນຖ່າຍແລ້ວເອົາມາໃຫ້ເປັນຂອງທີ່ລະລຶກກ່ອນກັບບ້ານ ດີໃຈຫຼາຍທີ່ໄດ້ຮັບ

ແລະ ຊ່ວງບ່າຍແມ່ນຈັດງານເວຣີກຊອບເພື່ອລວບລວມຂໍ້ມູນ, ສະຫຼຸບຄວາມຮູ້ ແລະ ສິ່ງທີ່ຮູ້ສຶກຜ່ານການເຂົ້າຮ່ວມລາຍການເພື່ອກຽມສະເໜີບົດລາຍງານຢູ່ໂຕກຽວ.

ອາຫານຄໍ່າ ເບິ່ງທໍາອິດບໍ່ເປັນຕາຢາກເລີຍ ຢາກເກັບມ້ຽນເອົາໄປຝາກໃຫ້ຫຼານສາວຫຼາຍກວ່າ ຮະໆ

ວັນທີ 22 ຕຸລາ 2018 ພາກັນກຽມຕົວແລ້ວເດີນທາງຈາກແຂວງອິວາເຕະ Iwate ກັບ ເມືອງໂຕກຽວ Tokyo ດ້ວຍລົດໄຟຊິນກັນເຊນ Yamabiko. ຊ່ວງນີ້ແມ່ນນອນເອົາແຮງເລີຍບໍ່ໄດ້ສັງເກດຫຍັງເລີຍ 555.

ຫຼັງຈາກມາເຖິງໂຕກຽວໃນເວລາ 3 ໂມງປາຍ ແລ້ວກໍພາກັນກັບບ່ອນພັກ ແລ້ວແຍກຍ້າຍກັນໄປພັກຜ່ອນ. ໃນຊ່ວງແລງກໍເຂົ້າຮ່ວມພິທີສະເໜີບົດລາຍງານກ່ຽວກັບຄວາມຮູ້, ສິ່ງທີ່ຕົນໄດ້ຄົ້ນພົບ, ໝາກຜົນຂອງການຢ້ຽມຢາມຍີ່ປຸ່ນ ແລະ ແຜນປະຕິບັດງານພາຍຫຼັງກັບຄືນປະເທດໃຫ້ກະຊວງການຕ່າງປະເທດ ແລະ ຜູ້ກ່ຽວຂ້ອງ ຂອງກຸ່ມຄົນລາວ ແລະ ກຸ່ມຄົນອິນໂດເນເຊຍ ໂດຍຕົວແທນປະເທດລະສອງຄົນອອກລາຍງານ. (ກຸ່ມຄົນລາວ ແລະ ກຸ່ມຄົນອິນໂດເນເຊຍແມ່ນໄປຄົນລະແຂວງກັນ ເລີຍພົບກັນແຕ່ຢ່ໂຕກຽວເທົ່ານັ້ນ).

ນ້ອງໆກໍາລັງພາກັນພຣີເຊັນຢ່າງຕັ້ງໃຈ

ຫຼັງຈາກນັ້ນໄດ້ເວລາໄປຂຶ້ນຫໍຄອຍໂຕກຽວ Tokyo Tower

ວິວຈາກຫໍຄອຍ

ວັນທີ 23 ຕຸລາ 2018 ໄດ້ເວລາທີ່ພວກເຮົາຕ້ອງອໍາລາຈາກປະເທດຍີ່ປຸ່ນ ຮອດຈຸດໆນີ້ກໍຮູ້ສຶກດີໃຈແນ່ ເສົ້າໃຈແດ່ ແຕ່ທຸກຢ່າງກໍລ້ວນແຕ່ເປັນປະສົບການທີ່ດີ ແລະ ສໍາຄັນຫຼາຍຕໍ່ຊີວິດ.